Ko Parihaka tētehi papa kāinga ki te rohe o Taranaki Iwi, e tū takawaenga nei i te takutai moana me te tapa ngahere o te mounga, waihoki, e tū toro ana ki te uru rawa o te kūreitanga o Taranaki. Nā ngā rangatira, a Tohu Kākahi rāua ko Te Whiti-ō-rongomai i whakaara hei kāinga whai tikanga hou i te Hānuere o te tau 1866. I roto i ngā tau whai muri ka piki te tini tāngata i noho ki Parihaka ki te ono mano neke atu tōna rahi. I whakatūria a Parihaka i runga i ngā tikanga o te Ririkore, o te mahi tahi me te rangatiratanga o te iwi Māori. I āta tāmingia aua tikanga e te Karauna i roto i ngā tau.

I te tuaiwa o ngā rā o Hune i te tau 2017, i tāmokongia tētehi whakaaetanga i waenga i a Parihaka me te Karauna, e kïia nei ko Te Kawenata o Rongo. Kei roto i ngā whārangi i tāmokongia tētehi Tauākï e takoto nei ngā kōrero mō te ahunga mai o Te Tikanga o Tohu rāua ko Te Whiti me te whakaahua i ngā aronga nui mō tōna āpōpō. Ko taua Tauākï rā te aronga matua o tēnei tuhinga. Nā te Komiti hautū o te whakaaetanga ki te Karauna, a ‘Parihaka Whakamua’, taua tukanga hohou-rongo i kōkiri. Ko te wāhanga i a au, ko te whakahïnga o taua Tauākï e whakaaringia ana ki Te Tikanga o Parihaka i ngā whārangi i tāmokongia. He tuhinga tēnei hei whakamārama i te ara i puta mai ai te Tauākï Tikanga Tuku Iho, otirā, hei whakatauira i te tūmomo reo i whakamahia i te whakahïnga ake o te kōrero.

Kei tēnei tuhinga, ka tïmata ki ētehi kōrero hei whakarāpopoto i ngā mahi whakariterite I waihangatia ai te Kawenata o Rongo. Ka tohua ngā rerekētanga o te whakaaetanga i hainatia ki Parihaka, ki ērā e kitea nei ki ngā whakataunga kerēme ā-iwi. Ka whakamāramatia te tukanga i whāia kia takoto ngā kupu ki te tauākï mō Te Tikanga. Ka whakarārangihia Te Tauākï Tikanga Tuku Iho, kātahi ka wewetengia ngā aronga e whitu o te hanga i taua tauākï me te reo i whakamahia.