He reo rua katoa te iwi kōrero Māori. Ko tētahi uaua o te whakaora i te reo Māori, ko te āta noho me te kōrero Māori. Nā whai anō ko te reo Pākehā te reo matua mō te nuinga o te iwi kōrero Māori. Ki te whakaarohia te manga, kua mau pea tātou ki te taha reo Pākehā o taua manga, kua kore e mōhio me pēhea rā e whiti atu ai ki te taha reo Māori. E tika ana, me mōhio te reo rua Māori ki ngā tahataha e rua, tō te reo Māori, tō te reo Pākehā, me te kanikani anō hoki i runga i te piriti i runga i ngā terenga wai e rere ana ki raro i a ia. E kāpuia ana te kōrerotia o ōna reo me tēnei tūāhuatanga e kīia nei he kōwhiri reo. Koinei te kaupapa nui i wānangahia i te tohu kairangi a te kaituhi.

Whakarāpopototanga: Ahakoa ōna painga anō, ko tetahi hangarau i pā kino nei ki te iwi Māori, ko te reo irirangi kawe reo Pākehā. Neke atu i te rau tau ia e whakapāho mai ana i te reo Pākehā ki ngā hapori o Aotearoa. Nā wai rā, ka noho tangata whenua te reo Pākehā nei ki te iwi Māori, ā, ka noho manuhiri kē, ko tōna ake reo Māori. Heoi anō , kua kite noa te Māori, ka whai oranga tōna reo, menā he hangarau pēnei anō kai ōna ringaringa hai kawe ake i tōna reo Māori ki ōna iwi katoa. Ināianei, kua eke ki te rua tekau mā rima tau te pakeke o te nuinga o ngā reo irirangi kawe reo Māori, rua tekau katoa nei.